Magahi An Uyo

Nag-iban an tatay sanan an ija jiyes anyos na anak na layaki pagbisita sa lote na bag’o pa pinalit nan ama.

“Dinhi ‘ta mamalhin sa sunod ‘Nak, tukuran nato nan bayay inina loteha,” deklarasyon nan ama sa ija sa anak.

Duro an nosantop sa hunahuna nan bata.

“’Tapos ‘Tay, butangan nila ini nan duro na mga kahoy?” pangutana nan bata sa ija tatay.

“Oo.”

“Yehey! Maglatay-latay dajon ako ‘Tay.”

”Hanugay ‘Nak kay malagbong ‘kaw, madisgrasya ‘kaw.”

“Palatay-lataja lamang ako ‘Tay, Sigi na, ‘Tay!”

“Hanugay lagi, kagahi gajud nan uyo nimo,” najuhot na an tatay.

Kadugajan nan ila lalis, ingkabunajan ra gajud an anak nan ija ama.

Pagpaka-uli na nila ila bayay, nangutana an nanay sa tatay kun uno man na ingka-bunajan man nija an ila anak.

“Kay gusto man maglatay-latay,” an tubag nan tatay sa ija asawa.